*ಭ್ರಷ್ಟಾಚಾರದ ವಿರುದ್ಧ ಹೋರಾಟ, ಶಿಕ್ಷಣಕ್ಕೆ ಸಮರ್ಪಣೆ*

*ಭ್ರಷ್ಟಾಚಾರದ ವಿರುದ್ಧ ಹೋರಾಟ, ಶಿಕ್ಷಣಕ್ಕೆ ಸಮರ್ಪಣೆ*

Breaking news:-ನಿರ್ಭಯ ನ್ಯೂಸ್

ನವಲಗುಂದ : ಬಂಡಾಯದ ನಾಡು ನವಲಗುಂದದಲ್ಲಿ ಮಹದಾಯಿ ಹಾಗೂ ಕಳಸಾ- ಬಂಡೂರಿ ರೈತ ಚಳುವಳಿಯ ಮೂಲಕ ಸಾಮಾಜಿಕ ಕ್ಷೇತ್ರದಲ್ಲಿ ದುಮುಕಿದ ರೈತ ಮುಖಂಡ ಮಾಬುಸಾಬ ಯರಗುಪ್ಪಿ ಅವರು ಶಿಕ್ಷಣ ಕ್ಷೇತ್ರದಲ್ಲಿ ಸಾಕಷ್ಟು ಬದಲಾವಣೆ ಮಾಡಿದ ಯುವ ನಾಯಕ, ದಕ್ಷಿಣ ಆಫ್ರಿಕಾದ ಮಾಜಿ ಅಧ್ಯಕ್ಷ ನೆಲ್ಸನ್ ಮಂಡೇಲಾ ಅವರು ಹೇಳಿದಂತೆ

“ಭವಿಷ್ಯವನ್ನು ಬದಲಾಯಿಸಲು ಶಿಕ್ಷಣವು ಅತ್ಯಂತ ಶಕ್ತಿಶಾಲಿ ಅಸ್ತ್ರವಾಗಿದೆ ಅವರ ಈ ಮಾತುಗಳು ಯುವ ಹೋರಾಟಗಾರ ಮಾಬುಸಾಬ ಯರಗುಪ್ಪಿ ಅವರ ಜೀವನ ಮತ್ತು ಕಾರ್ಯಗಳಿಗೆ ಸರಿಯಾಗಿ ಅನ್ವಯಿಸುತ್ತದೆ.

*ಭ್ರಷ್ಟರ ಪಾಲಿನ ಸಿಂಹ ಸ್ವಪ್ನ*

ಅವರು ಒಂದು ಕಡೆ ಮಾಹಿತಿ ಹಕ್ಕು ಕಾಯ್ದೆಯ ಮೂಲಕ ಭ್ರಷ್ಟಾಚಾರದ ಬೇರುಗಳನ್ನು ಅಲುಗಾಡಿಸುತ್ತಿದ್ದರೆ, ಮತ್ತೊಂದು ಕಡೆ ಶಿಕ್ಷಣ ಪ್ರೇಮಿಯಾಗಿ ಬಡ ಮತ್ತು ಗ್ರಾಮೀಣ ಮಕ್ಕಳಿಗೆ ಭದ್ರ ಅಡಿಪಾಯ ಹಾಕುವಲ್ಲಿ ತಮ್ಮನ್ನು ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದಾರೆ. ಕೇವಲ ಒಬ್ಬ ಮಾಹಿತಿ ಹಕ್ಕು ಕಾರ್ಯಕರ್ತರಲ್ಲ, ಅವರು ಸಾರ್ವಜನಿಕ ಜೀವನದಲ್ಲಿ ಪಾರದರ್ಶಕತೆ ಮತ್ತು ಜವಾಬ್ದಾರಿ ತರುವ ಪ್ರತಿಜ್ಞೆ ಮಾಡಿರುವಂತಹ ಕ್ರಾಂತಿಕಾರಿ ಹೋರಾಟಗಾರ, ಅವರ ಹೋರಾಟ ಎಷ್ಟು ಪ್ರಖರವಾಗಿದೆ ಎಂದರೆ ಅನೇಕ ಇಲಾಖೆಗಳ ಭ್ರಷ್ಟ ನೌಕರರು ಮತ್ತು ಅಧಿಕಾರಿಗಳ ಪಾಲಿಗೆ ಇವರು ನಿಜಕ್ಕೂ ಸಿಂಹ ಸ್ವಪ್ನವಾಗಿದ್ದಾರೆ, “ಒಬ್ಬ ಮನುಷ್ಯ ಬದುಕಿನಲ್ಲಿ ಜಯ ಸಾಧಿಸಲು ಮೊದಲು ಆತ ತನ್ನೊಳಗಿನ ಭಯವನ್ನು ಜಯಿಸಬೇಕು.” ಈ ಮಾತನ್ನು ತಮ್ಮ ಬದುಕಿನಲ್ಲಿ ಅಳವಡಿಸಿಕೊಂಡಿರುವ ಅವರು ಭ್ರಷ್ಟಾಚಾರದ ವಿರುದ್ಧದ ಹೋರಾಟದಲ್ಲಿ ಯಾವುದೇ ಬೆದರಿಕೆಗಳಿಗೆ ಜಗ್ಗದೆ, ರಾಜ್ಯ ಮಟ್ಟದ ಮಾಹಿತಿ ಆಯೋಗಳಲ್ಲಿ, ಲೋಕಾಯುಕ್ತದಲ್ಲಿ, ಮತ್ತು ಸರ್ಕಾರದ ಉನ್ನತ ಅಧಿಕಾರಿಗಳ ಮಟ್ಟದಲ್ಲಿ ಅನೇಕ ಪ್ರಕರಣಗಳನ್ನು ದಾಖಲಿಸಿ ತಮ್ಮ ಕಾನೂನು ಸಮರವನ್ನು ಮುಂದುವರೆಸಿದ್ದಾರೆ. ಸಮಾಜಕ್ಕಾಗಿ ತಮ್ಮ ಬದುಕು ಮೀಸಲಾಗಿಸಿ ತಮ್ಮನ್ನು ಸಂಪೂರ್ಣವಾಗಿ ಅರ್ಪಿಸಿಕೊಂಡಿದ್ದಾರೆ.

*ಶಿಕ್ಷಣವೇ ಬದುಕಿನ ಬೆಳಕು*

ಮಾಬುಸಾಬ ಅವರಿಗೆ ಶಿಕ್ಷಣ ಕೇವಲ ಪಠ್ಯವಲ್ಲ, ಅದು ಬಡ ಮಕ್ಕಳ ಬದುಕನ್ನು ಬೆಳಗುವ ದಿವ್ಯ ಜ್ಯೋತಿ. ಅವರ ಈ ನಿಲುವು ಕವಿ ಕುವೆಂಪು ಅವರ ಮಾತುಗಳನ್ನು ನೆನಪಿಸುತ್ತದೆ: “ಎಲ್ಲಾದರೂ ಇರು ಎಂತಾದರೂ ಇರು, ಎಂದೆಂದಿಗೂ ನೀ ಕನ್ನಡವಾಗಿರು” ಎಂಬಂತೆ, ಎಲ್ಲಿದ್ದರೂ ತಮ್ಮ ಸಮಾಜಮುಖಿ ಮತ್ತು ಶೈಕ್ಷಣಿಕ ಕೆಲಸಗಳಿಗೆ ಬದ್ಧರಾಗಿದ್ದಾರೆ.

ವಿದ್ಯಾರ್ಥಿಗಳ ಶೈಕ್ಷಣಿಕ ಪ್ರಗತಿಗಾಗಿ ಅವರು ಕೈಗೊಂಡಿರುವ ಕೆಲಸಗಳು ಅನುಕರಣೀಯ.

*ಮೂಲಭೂತ ಸೌಕರ್ಯಗಳ ಕೊಡುಗೆ*

ಶಾಲಾ ಮಕ್ಕಳ ಮಧ್ಯಾಹ್ನದ ಊಟದಲ್ಲಿ ಮೊಟ್ಟೆ ಬೇಯಿಸಲು ಅನುಕೂಲವಾಗುವಂತೆ ಅನೇಕ ಶಾಲೆಗಳಿಗೆ ಗ್ಯಾಸ್ ಸಿಲೆಂಡರ್ ಮತ್ತು ಗ್ಯಾಸ್ ಸ್ಟೋವ್‌ಗಳನ್ನು ಕೊಡುಗೆಯಾಗಿ ನೀಡಿದ್ದಾರೆ. ಅದಷ್ಟೇ ಅಲ್ಲದೆ ಮಕ್ಕಳಿಗೆ ಸಣ್ಣ-ಪುಟ್ಟ ಗಾಯಗಳಿಗೆ ನೆರವಾಗಲು ಪ್ರಥಮ ಚಿಕಿತ್ಸಾ ಪೆಟ್ಟಿಗೆ ಜೊತೆಗೆ ಸ್ವತ ತಾವೇ ನೋಟ್ ಬುಕ್‌ಗಳು, ಪೆನ್ನುಗಳನ್ನು ವಿತರಿಸಿದ್ದಲ್ಲದೆ, ಅನೇಕ ದಾನಿಗಳನ್ನು ಪ್ರೇರೇಪಿಸಿ ಶಾಲಾ ಮಕ್ಕಳಿಗೆ ಉಚಿತ ನೋಟ್ ಬುಕ್, ಬ್ಯಾಗ್‌ಗಳನ್ನು ಕೊಡಮಾಡಿದ್ದಾರೆ. ಅವರ ಈ ಕಾರ್ಯಗಳು, ಬಡವರ ಮಕ್ಕಳು ಶಿಕ್ಷಣದ ಮೂಲಕ ಬೆಳೆಯಬೇಕು ಎಂಬ ಅವರ ಅಚಲ ತತ್ವಕ್ಕೆ ಸಾಕ್ಷಿಯಾಗಿವೆ. ತಮ್ಮ ಬದುಕಿಗೆ ಆತಂಕವಿದ್ದರೂ, ಮಕ್ಕಳ ಭವಿಷ್ಯಕ್ಕೆ ಶಿಕ್ಷಣದ ಗಟ್ಟಿ ಅಡಿಪಾಯ ಹಾಕುವಲ್ಲಿ ಅವರು ಸದಾ ಮುಂಚೂಣಿಯಲ್ಲಿರುತ್ತಾರೆ.

*ಗುರುಗಳಿಗೆ ಗೌರವ, ಸಾಧಕರಿಗೆ ಸನ್ಮಾನ*

ಮಾಬುಸಾಬ ಅವರು ಕೇವಲ ಹೋರಾಟಗಾರರಾಗಿ ಉಳಿದಿಲ್ಲ, ಅವರು ಸಮಾಜವನ್ನು ಒಗ್ಗೂಡಿಸುವ ಸಂಘಟನಾಕಾರರೂ ಹೌದು. ಅವರು ಕಟ್ಟಿರುವ ‘ಉತ್ತರ ಕರ್ನಾಟಕ ಪರಿವರ್ತನ ಸಮುದಾಯದ ಮೂಲಕ ಅನೇಕ ಸಮಾಜಮುಖಿ ಕಾರ್ಯಕ್ರಮಗಳನ್ನು ಸಂಘಟಿಸಿದ್ದಾರೆ.

ಈ ಕಾರ್ಯಕ್ರಮಗಳ ಮೂಲಕ ತಮಗೆ ವಿದ್ಯಾದಾನ ಮಾಡಿದ ಗುರುಗಳನ್ನು ಹಾಗೂ ಸಮಾಜದಲ್ಲಿ ಮಹತ್ತರ ಸಾಧನೆ ಮಾಡಿದ ಗಣ್ಯ ವ್ಯಕ್ತಿಗಳನ್ನು ಸನ್ಮಾನಿಸಿ ಗೌರವಿಸುವ ಮೂಲಕ ಸಮಾಜದಲ್ಲಿ ಮೌಲ್ಯ ಮತ್ತು ಕೃತಜ್ಞತೆಯ ಸಂದೇಶವನ್ನು ಸಾರಿದ್ದಾರೆ.

ಅಮೇರಿಕಾದ ಶ್ರೇಷ್ಠ ದಾರ್ಶನಿಕ ರಾಲ್ಫ್ ವಾಲ್ಡೋ ಎಮರ್ಸನ್ ಹೇಳಿದಂತೆ: “ಒಳ್ಳೆಯ ಕೆಲಸಗಳನ್ನು ಮಾಡುವುದೇ ನಾವು ಬದುಕಿನಲ್ಲಿ ಮಾಡಬಹುದಾದ ಅತ್ಯುತ್ತಮ ಹೂಡಿಕೆ.” ಮಾಬುಸಾಬ ಅವರು ಚಿಕ್ಕ ವಯಸ್ಸಿನಲ್ಲಿಯೇ ಇಂತಹ ಹಿರಿದಾದ, ಅರ್ಥಪೂರ್ಣವಾದ ಕಾರ್ಯಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು, ಸಮಾಜಕ್ಕೆ ಮಾದರಿಯಾಗಿದ್ದಾರೆ, ಅವರು ಇಂದು ನೂರಾರು ಕನಸುಗಳ ವಾರಸುದಾರರು. ಭ್ರಷ್ಟಾಚಾರ ಮುಕ್ತ ಸಮಾಜದ ನಿರ್ಮಾಣ ಮತ್ತು ಪ್ರತಿಯೊಂದು ಮಗುವಿಗೆ ಉತ್ತಮ ಶಿಕ್ಷಣದ ಕನಸುಗಳನ್ನು ನನಸಾಗಿಸಲು ಅವರು ತಮ್ಮದೇ ಶ್ರಮ ಹಾಕುತ್ತಿದ್ದಾರೆ. ಸಮಾಜದಲ್ಲಿ ಗಟ್ಟಿಯಾಗಿ ಬೇರೂರುತ್ತಿರುವ ಅವರ ಈ ಪಯಣವು ಅನೇಕ ಯುವಕರಿಗೆ ಸ್ಫೂರ್ತಿಯ ಚಿಲುಮೆಯಾಗಿದೆ.

ಅತೀ ಚಿಕ್ಕ ವಯಸ್ಸಿನಲ್ಲಿಯೇ ಸಮಾಜದಲ್ಲಿ ತುಂಬಿ ತುಳಕುತ್ತಿದ್ದ ಭ್ರಷ್ಟಾಚಾರದ ಬುಡ ಅಳುಗಾಡಿಸುವಂತಹ ಕೆಲಸ ಮಾಡಿದ್ದಾರೆ, ಇವರದು ಪ್ರಾಮಾಣಿಕ ಮತ್ತು ದಿಟ್ಟ ಹೋರಾಟ, ಒಮ್ಮೆ ಮುಂದೆ ಇಟ್ಟ ಹೆಜ್ಜೆ ಎಂತಹ ಸಂಧಿಗ್ದ ಪರಿಸ್ಥಿತಿ ಎದುರಾದರೂ ಹಿಂದೆ ಇಡುವುದಿಲ್ಲ, ಅಂತಹ ಗಟ್ಟಿ ಹೋರಾಟ ಮಾಡುತ್ತಾ ಬರುತ್ತಿರುವಂತಹ ಇವರ ಹೋರಾಟಕ್ಕೆ ಜಯವಾಗಲಿ, ಅವರು ಮುಂದೆಯು ಕೂಡಾ ಜನಪರ ಕಾರ್ಯಗಳನ್ನು ಮಾಡಲಿ.

ಬಸನಗೌಡ ಪಾಟೀಲ್ 

ರೈತ ಮುಖಂಡರು, ನವಲಗುಂದ

ಸರ್ಕಾರಿ ಕೆಲಸಗಳಲ್ಲಿ ಪಾರದರ್ಶಕ ಆಡಳಿತಕ್ಕಾಗಿ ನಿರಂತರ ಹೋರಾಟ ಮಾಡುತ್ತಿರುವಂತಹ ಯುವ ನಾಯಕ ಮಾಬುಸಾಬ ಯರಗುಪ್ಪಿ ಅವರ ಸೇವೆ ಸ್ಮರಣಿಯ, ಕಳೆದ ಒಂದು ದಶಕದಿಂದ ಮಾಹಿತಿ ಹಕ್ಕು ಕಾಯ್ದೆಯ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ, ಭ್ರಷ್ಟ ಅಧಿಕಾರಿಗಳ ಬಣ್ಣ ಬಯಲು ಮಾಡುವ ಇವರು ಬಡವರ ಪರ ನ್ಯಾಯಕ್ಕಾಗಿ ಹೋರಾಟ ಮಾಡುತ್ತಿದ್ದಾರೆ.

ರಿಯಾಜಅಹ್ಮದ ನಾಶಿಪುಡಿ

ಅಧ್ಯಕ್ಷರು, ಡಾ: ಎ.ಪಿ.ಜೆ ಅಬ್ದುಲ್ ಕಲಾಂ ಅಭಿಮಾನಿಗಳ ಸಂಘ (ರಿ) ನವಲಗುಂದ

ಸಮಾಜವೇ ನನ್ನ ಉಸಿರು, ಈ ನಾಡಿನ ಋಣ ತೀರಿಸುವಂತಹ ಕೆಲಸ ಮಾಡುತ್ತಿದ್ದೇನೆ, ಭ್ರಷ್ಟ ಅಧಿಕಾರಿಗಳು ಸರ್ಕಾರ ನೀಡುವಂತಹ ಸಂಬಳಕ್ಕಿಂತ ಗಿಂಬಳಕ್ಕೇ ಕೈ ಒಡ್ಡುತ್ತಿರುವುದು ದುರದೃಷ್ಟ, 2005 ರ ಮಾಹಿತಿ ಹಕ್ಕು ಕಾಯ್ದೆಯನ್ನು ಬಳಸಿ ಭ್ರಷ್ಟ ಅಧಿಕಾರಿಗಳ ವಿರುದ್ಧ ಸಮರ ಸಾರಿದ್ದೇನೆ, ಜೊತೆಗೆ ಶಿಕ್ಷಣ ಕ್ಷೇತ್ರ ಬದಲಾವಣೆಗೆ ಪಣ ತೊಟ್ಟು ಹೋರಾಟ ಆರಂಭಿಸಿ ದಶಕವೇ ಕಳೆದಿದೆ, ಸರ್ಕಾರಿ ಶಾಲೆ ಉಳಿಬೇಕು ಮತ್ತು ಬೆಳಿಬೇಕು ಎನ್ನುವ ತತ್ವ ನನ್ನದು.

ಮಾಬುಸಾಬ ಯರಗುಪ್ಪಿ 

ಸಮಾಜ ಸೇವಕರು, ನವಲಗುಂದ

ಸುದ್ದಿ ಜಾಹೀರಾತಿಗಾಗಿ ,ನಿರ್ಭಯ ದೃಷ್ಟಿ ನ್ಯೂಸ್ ಸಂಪರ್ಕಿಸಿ 📞 9164386713